Gjatë javës së fundit, autoritetet doganore kanë ndërmarrë disa aksione të suksesshme për ndalimin e hyrjes së paligjshme të mallrave në vend. Në operacionet e kryera në pika të ndryshme kufitare, janë konfiskuar cigare pa banderola, pajisje teknologjike dhe mallra të dyshuara si të falsifikuara.
Në pikën kufitare të Bogorodicës, gjatë kontrollit të një kamioni cisternë, doganierët gjetën 12 steka cigare të fshehura në pjesën e sipërme të automjetit. Vlera e këtyre cigareve llogaritet në 16.200 denarë, ndërsa detyrimet e shmangura janë përllogaritur në 27.195 denarë.
Një rast i ngjashëm ndodhi në pikën kufitare të Dojranit, ku një tjetër kamion u ndalua dhe u sekuestruan 10 steka cigare që ndodheshin në kabinën e drejtuesit të mjetit. Vlera e mallrave ishte 6.480 denarë dhe shmangia e taksave kapte shifrën e 15.896 denarëve.
Në kufirin e Bllacës, doganierët ndaluan një përpjekje për të futur ilegalisht një dron profesional të modelit “MAVIC 2 ENTERPRISE” së bashku me bateri, karikues dhe kontrollues, me vlerë të përgjithshme rreth 159.660 denarë.
Në operacione të tjera, janë sekuestruar produkte me marka të mbrojtura që dyshohet se janë të falsifikuara. Në një rast, u konfiskuan 15 makina elektrike për fëmijë, ndërsa në një tjetër – 1.190 fletore, 70 tenda dhe 1.390 lodra, të gjitha me marka tregtare të mbrojtura.
Autoritetet theksojnë se do të vazhdojnë kontrollet e rrepta në kufij për të parandaluar kontrabandën dhe shkeljet e të drejtave të pronësisë intelektuale.
