Një person është vënë nën akuzë nga Prokuroria Speciale për veprën penale të shpëlarjes së parasë, pas një hetimi që zbuloi menaxhimin e afër 900 mijë eurove të dyshuara si të përfituara nga veprimtari kriminale.
Sipas aktakuzës së dorëzuar në Gjykatën Themelore të Prishtinës, i pandehuri G.S. dyshohet se gjatë viteve 2019–2023 ka menaxhuar dhe fshehur origjinën e parave përmes kontratave fiktive dhe në bashkëpunim me persona të tjerë jashtë vendit.
Në këtë proces është përfshirë edhe një subjekt juridik me inicialet “G.S. I.S.”, i cili dyshohet se është përdorur si mjet për të legalizuar pasurinë e përfituar në mënyrë të paligjshme.
Me kërkesë të Prokurorisë, janë sekuestruar pesë parcela tokësore me vlerë rreth 355,800 euro, si dhe prona të tjera që arrijnë vlerën e përgjithshme deri në 400 mijë euro. Prokuroria ka propozuar konfiskimin e këtyre pronave pas përfundimit të procesit gjyqësor.
Ndaj të pandehurit është propozuar dënimi plotësues i ndalimit të ushtrimit të veprimtarisë afariste, ndërsa për subjektin juridik është kërkuar edhe pushimi i veprimtarisë.
