Një përleshje e dhunshme me thika ndodhi mbrëmjen e sotme (17 qershor) në lagjen Çair të Shkupit, duke lënë të plagosur tre persona, përfshirë një djalë 14-vjeçar.
Sipas njoftimit zyrtar nga Ministria e Punëve të Brendshme, rreth orës 19:48 u raportua për një konflikt fizik në kryqëzimin mes rrugëve “Cvetan Dimov” dhe “Xhon Kenedi”. Konflikti kishte nisur pas një mosmarrëveshjeje të mëparshme mes palëve të përfshira.
Në incident u përfshinë një 14-vjeçar dhe dy persona të moshës 18 dhe 64 vjeç, të gjithë nga Shkupi. Përleshja eskaloi në përdorim të thikave, duke rezultuar në plagosjen e të treve.
Të lënduarit u dërguan me urgjencë në Spitalin e Përgjithshëm të Qytetit “Shën Naum Ohridski” dhe në Qendrën Klinike “Nënë Tereza”, ku morën trajtim mjekësor.
Autoritetet kanë nisur hetimet për të zbardhur rrethanat dhe shkaqet e incidentit që ka alarmuar banorët e zonës.
