Ylli i Real Madridit, Kylian Mbappé, është shtruar në një qendër spitalore në SHBA për shkak të një forme të rëndë të gastroenteritit akut, pas disa ditësh me shqetësime të vazhdueshme shëndetësore.
Problemet nisën që të hënën, menjëherë pas një seance stërvitore, kur 26-vjeçari filloi të shfaqte simptoma të rënda që e detyruan të qëndrojë i izoluar në një dhomë hoteli. Prej datës 16 qershor, ai është ushqyer vetëm me ujë dhe fruta dhe nuk ka marrë pjesë në stërvitje, as nuk ka qenë pranë pjesës tjetër të skuadrës.
Sulmuesi francez mungoi edhe në ndeshjen kundër Al Hilal, që përfundoi 1-1, dhe tashmë është përjashtuar nga përballja e ardhshme ndaj Pachucas në Grupin G. Vendimi për ta dërguar në spital u mor pasi gjendja e tij nuk shënoi përmirësim të ndjeshëm dhe kërkonte trajtim më të specializuar nën mbikëqyrje mjekësore të afërt.
Kushtet klimatike në SHBA – me temperatura të larta dhe lagështi – janë një tjetër faktor që mund të ndikojë në vonesën e rikuperimit të tij.
Ndërkohë, pavarësisht mungesës momentale, Mbappé ka pasur një sezon të jashtëzakonshëm me Real Madridin, duke shënuar 43 gola dhe dhënë 5 asistime në 56 paraqitje.
Rikthimi i tij në fushë do të varet nga vendimi i stafit mjekësor.
