Në një operacion të gjerë të zhvilluar në fshatin Vallaq të Zveçanit, Policia e Kosovës në bashkëpunim me AKI-në dhe nën mbikëqyrjen e KFOR-it dhe EULEX-it, ka zbuluar një sasi të madhe armatimi.
Në objektin e bastisur, që sipas autoriteteve i përket politikanit serb Aleksandar Arsenijeviq, janë gjetur raketahedhës dore, granata, armë automatike dhe sasi të konsiderueshme municioni – mjaftueshëm për të armatosur një njësi të tërë.
Ministri i Punëve të Brendshme në detyrë, Xhelal Sveçla, deklaroi se ky zbulim përbën rrezik serioz për sigurinë e vendit. Ai theksoi se objektivi i institucioneve është çrrënjosja e strukturave kriminale që vijnë nga veriu.
“Sot kemi goditur një strukturë që paraqet rrezik të drejtpërdrejtë për sigurinë dhe stabilitetin e vendit tonë. Krimi nuk mund të fshihet kurrë, pavarësisht petkut që vesh”, shkroi Sveçla në Facebook.
Sipas tij, institucionet e sigurisë do të vazhdojnë pa kompromis operacionet për të garantuar rendin në çdo pjesë të territorit të Kosovës.
