Autoritetet izraelite kanë urdhëruar largimin e të gjitha automjeteve elektrike nga portet kryesore të vendit, si një masë parandaluese në rast sulmesh të mundshme me raketa. Vendimi është marrë në sfondin e përshkallëzimit të konfliktit me Iranin dhe pas sulmit surprizë ndaj objektivave ushtarake dhe programit bërthamor iranian.
Si kundërpërgjigje, Irani ka lëshuar mbi 400 raketa dhe ka përdorur qindra dronë, ndërsa në situatë janë përfshirë edhe Shtetet e Bashkuara, çka ka rritur ndjeshëm tensionin në rajon.
Zyrtarët izraelitë kanë shprehur shqetësim për rrezikun që përbëjnë automjetet elektrike në rast sulmi, pasi bateritë e tyre litium-jon janë shumë të ndjeshme dhe mund të shkaktojnë zjarre të mëdha që janë të vështira për t’u kontrolluar. Kjo masë prek portet strategjike si Haifa dhe Ashdod, ku zakonisht magazinohen mijëra automjete të reja.
Porti i Haifës, që është ndër qendrat më të mëdha detare në vend, përpunon mbi 20 milionë tonë mallra në vit, dhe çdo shpërthim mund të ketë pasoja të rënda logjistike dhe ekonomike.
Kjo lëvizje e autoriteteve tregon përgatitjet serioze për një përballje të gjatë dhe pasiguri të thellë për zhvillimet e ardhshme në rajonin e trazuar të Lindjes së Mesme.
