Skuadra e Interit ka marrë një lajm inkurajues para përballjes së rëndësishme në Kupën e Botës për Klube ndaj Fluminense.
Sulmuesi Marcus Thuram dhe mesfushori Davide Frattesi janë rikthyer në stërvitje individuale, duke dhënë sinjale pozitive për rikuperimin e tyre pas dëmtimeve. Të dy lojtarët u stërvitën të premten në Charlotte, Karolina e Veriut, ku ekipi italian po zhvillon përgatitjet për fazën e ardhshme të turneut.
Pjesa tjetër e skuadrës kishte një ditë pushimi, por dy lojtarët shfrytëzuan mundësinë për të testuar gjendjen fizike dhe për t’u ambientuar me qendrën stërvitore të Charlotte FC, ku do të qëndrojë Interi.
Ndeshja ndaj Fluminense do të luhet të hënën më 30 qershor, në orën 21:00. Të dyja skuadrat janë ende të pamposhtura në këtë fazë të turneut. Interi ka reaguar mirë pas një fillimi të vështirë, ndërsa skuadra braziliane ka treguar forcë duke mundur Ulsanin dhe barazuar ndaj Mamelodi Sundowns dhe Borussia Dortmund.
