Policia e Kosovës ka ndëshkuar një shofer 41-vjeçar në Ferizaj, i cili u kap duke drejtuar automjetin me 115 kilometra në orë në një zonë ku kufizimi i lejuar është 50 km/h.
Ngjarja ndodhi rreth orës 03:05 të mëngjesit, në rrugën magjistrale Ferizaj–Prishtinë, në fshatin Prelez të Ferizajt. Sipas njoftimit të Njësisë së Trafikut Rrugor, automjeti i tipit Audi me targa vendore u evidentua me radar si i tejkalues i ndjeshëm i shpejtësisë së lejuar.
Shoferi, i identifikuar me inicialet F.B. (41 vjeç), është ndëshkuar me:
- Gjobë prej 300 euro
- 3 pikë negative në patentë
- Ndalesë për drejtimin e automjetit për 3 muaj
Policia Rajonale e Ferizajt ka bërë të ditur se kontrollet në rrugë do të vazhdojnë me intensitet të lartë, me qëllim parandalimin e aksidenteve dhe rritjen e sigurisë në trafik.
“Apelojmë tek të gjithë shoferët që të respektojnë rregullat dhe shenjat e komunikacionit rrugor,” thuhet në deklaratën zyrtare të Policisë së Kosovës.
